Kimberley-bordeel: Twee vroue op borg vrygelaat

Twee vroue wat vermoedelik 'n weelderige huis in Kimberley in 'n bordeel omskep het, is op borgtog van R1 500 elk vrygelaat.

Woordvoerder vir die Valke in die Noord-Kaap, Philane Nkwalase, sê Nonsukiswa Dlamini en Nontumelelo Sonqishe, onderskeidelik van Kwazulu-Natal en die Oos-Kaap, is verlede week by die spoghuis in Royldene in hegtenis geneem.

Nkwalase sê die vroue se borg is gekoppel aan streng voorwaardes, om te verhoed dat hulle hul beweerde aktiwiteite voortsit.

Volgens Nkwalase het die vroue die bordeel in 'n luukse huurhuis bedryf sonder dat die eienaar daarvan bewus was.